Kort am e SSW  

Dåt lönj Schlaswik-Holstiinj as iinj foon da 16 lönje foon Tjüschlönj. Önj e förderaal ferfooting foon Tjüschlönj as fååstläid, dåt da änkelte lönje e feroontuurding for e (üt-)bildings- än e kultuurpolitiik än uk fort politiiweesen hääwe. Deer ütouer schan da lönje da ruchte, wat foon e bundesdäi - e jarst kåmer önj Tjüschlönj - beslin wörden san, önj da änkelte lönje uk döörseete. Önj e bundesrädj - e ouder kåmer önj Tjüschlönj - san åle 16 lönje repräsentiird. Ouerdåt maning ruchte jarst jüle wan´s uk döör e bundesrädj beslin wörden san, hääwe da lönje en was möölikhäid än nam influs aw maning ruchte, wat önj e jarste trees döör e bundesdäi beslin wårde.

Di loondäi önj Kil as et parlamänt foont lönj Schlaswik-Holstiinj. Di jarste demokraatisch kiisede loondäi trätj 1947 tuhuupe. Da loondäismååns än loondäiswüste kiise di ministerpräsidänt än beslite da ruchte, wat önjt lönj jüle schan. Tu tids regiird en koalitsjoon üt e SPD än da CDU. 

Di Söödschlaswiksche Wäälerferbånd (SSW) as, oufsänj foon en kort perioode önj da füftier iirnge, sunt 1947 önj e loondäi önj Kil präsänt. Üt histoorische grüne koon följk di SSW bloots önj e loonsdiilj Schlaswik kiise. Da biise manerhäide, wat jam döör e SSW fertreese lätje - da dånsche än da nordfrasche - laawe bloots önj dideere loonsdiilj. Önj Holstiinj wårde deerfor niinj kandidoote bai loondäiswoole döör e SSW apstald. 

Jü "Boon-Kuupenhuuwen-Deklaratsjoon" heet deertu fjard, dåt di SSW bai da loondäiswoole foon e 5%-klausel friseet wörd. Ouers di SSW schal tut manst sü maning stime füünj, as eefter en was rääkenwis nüsi san, for än fou en mandaat. Et jeeft 75 loondäismandaate än di SSW schal normaalerwis en lait mör as 20.000 stime füünj, am en loondäismandaat tu fouen. 

Foon 1971 bit 1996, mååst 25 iir lung, heet Karl Otto Meyer for e SSW önj e loondäi sin. Karl Otto Meyer häi di plåts foon di frasche Berthold Bahnsen üt Leek ouernümen. Bahnsen sätj ål önj da füftier iirnge bit tu san düüs 1971 önj e loondäi. Dåt süwälj dånsche as uk frasche di SSW önj e loondäi repräsentiird hääwe, wised uk eefter büten, dåt ham e SSW as fertreesing foon e dånsch manerhäid än da natsjonaale frasche ferstoont.

Sunt e önjfång foon da tachentier iirnge heet di SSW åltens mör stime füngen. Bai e leest loondäiswool kömen sü mör as 61.000 stime tuhuupe än südänji tuuchen 3 SSW-politikere önj e loondäi in. Tu tids wård e SSW önj e loondäi döör di frasche Lars Harms üt Hüsem (foto), Flemming Meyer üt Wålsbel än Jette Waldinger-Thiering üt Äkernföörde fertrin.