Da frasche önj e SSW
Dåt nasjonååle strääwen foon da frasche önj Nordfraschlönj koon tobeeg tu et 19. iirhunert eefterwised wårde. Da besträäwinge koon hum urs ai ma da foon da weestfrasche ferglike.
Önj da 1920er iirnge föngen da frasche önj ja politiisch intumische. Di följksfloose diiljt ham jütids ap önj da wat jam seelew as en tjüsche ståm än da wat jam as en nasjonååle manerhäid önj Tjüschlönj siie. Da „tjüsche frasche“ såchen ja seelew as tjüsche ma regjonåål identitäät, mans da nasjonååle frasche aw grün foon äin sprääke än kultuur ja seelew as en äin följk ferstiinj heewe. Dåt strääwen foon da nasjonååle frasche as foon e tjüsche stoot bekeemped wörden.
Uner de noome „Friesisch-Schleswigscher Verein“, deereefter „Foriining for nationale Frasche (diling: Friisk Foriining) as 1923 en feriining for e sprääke än kultuur foon da nasjonååle frasche grünläid wörden. De feriin strääwet derfor dåt e frasche sprääke bewåårt än ütbäget wård.
Da nasjonååle frasche heewe ja tu da woole önj e Weimarer Republik ma en äin "Liste Friesland" apstalt. Regjonåål heet jü liste uk en tid lung ma e dånsche manerhäid tuhuupeårbed än en geminsoom liste apstalt. De formoon foon e frasch-slaswiksche feriin, Johannes Oldsen, wörd aw e Liste Friesland 1925 önj de krisdäi foon Söödtuner kiiset, weer he bit 1933 blaft. He wus de iinjsiste wat 1933 iinj jü „Gleichschaltung“ strääwet heet, derma di krisdäi san influs behålt.
